لكل الى عايز يفتح معمل تحاليل؟؟؟؟؟

بسم الله الرحمن الرحيم
وبه نستعين .. والصلاة والسلام على أشرف المرسلين
سيدنا محمد "عليه أفضل الصلاة والسلام"
بصوا ياجماعة .... ده موضوع منقووووووول
بس لقيته مهم جداً لينا كدكاترة بيطرين .. ولكل اللي عاوز يشتغل بمجال معامل التحاليل...

سأتولى بإذن الله شرح خطوات مزاولة المهنة وعمل الدبلومات .. إلخ لانه قد أثير لغط كبير حول الموضوع وأثمرت الأقاويل عن تخرصات عشوائية وتكهنات لا طائل منها..

بس لازم أقول حاجة مهمة جدا جدا وأسأل سؤال مهم :

س / هل من حقي أن أفتح معمل ؟ وأكتب عليه اسمي ؟ وابقى دكتور تحاليل؟

هذا يقودنا إلى سؤال سؤال هام جدا : يعني قانونا هل المعمل ده من حقي ؟

* القانون المصري لسنة 54 لم يفرق في ممارسة مهنة التحاليل الطبية بين الكيميائي والصيدلي والطبيب .. إلخ بل هذا الحق يتساوى فيه جميع الخريجيين طالما قد استوفوا شهادات التخصص المطلوبة، واعتبره القانون المصري حق مكتسب ومشروع للجميع واعتبر مهنة التحاليل الطبية مهنة منفصلة عن باقي التخصصات الطبية الأخرى.

* هذا القانون معمول به في كثير من الدول العربية مثل تونس – سوريا وجميع دول العالم الأول مثل : أمريكا – كندا – فرنسا – ألمانيا – بريطانيا .. إلخ

* إن أقدر وأكفأ من يتعامل مع أجهزة التحليل الكيميائي كالأسبكتروفوتوميتر أو الفصل الكروموتوجرافي أو التحضير الكيميائي للعينات الكيميائية أو الإلمام بالتقنيات الكيميائية في التحليل الكيميائي أو العضوي مثل التحليل التربيديمتري أو الكلاريمتري أو الجرافيميتري هم الكيميائيون والبيطريون والصيادلة بحكم طبيعة الدراسة .

* المسألة تتلخص في تحليل عينة فقط فالجميع من أطباء أوغيرهم - رسميا - غير مطالبين : لا بتشخيص سريري – ولا بربط النتائج – ولا بكتابة علاج - أو تفسير نتيجة !!!

حتى سحب بعض العينات قد يخرج عن نطاق تخصصك!! مثل عينات الدم للمولودين حديثا (تعرض على أخصائي الأطفال) – عينات فحص الأورام ( أخصائي الباثولوجي) – عينات البذل النخاعي (التخدير أو الحميات)

* للأسف يروج بعض الأطباء في أحقيتهم وإلغاء أحقية الباقيين في ممارسة المهنة ويضعون العراقيل ويحاربون بشتى السبل من أجل ضع قصور على الباقيين في ممارسة المهنة، ويضغطون على وزير الصحة من أجل رفض إعطاء الترخيص والتحايل على القانون (الصريح)، ولي عنق الحقائق ، واتباع مبدأ "بروكر استيز" الذي كان يقطع أرجل ضيوفه لتناسب طول السرير الذي سينامون عليه !!! ويتفنون في وضع العراقيل لمنعنا من ممارسة المهنة مثل إجبارنا على رفع القضية وخلافه ؟؟؟ وكتابة عبارات في الصحف بغرض الإثارة : " تضافروا لقصر المهنة على الأطباء" أو من يكتب : " فوضى التحاليل الطبية"

سؤال فرعي / ما هي آخر صيحة في وضع القصور للمزاولة؟

(1) التصريح يكون بالماسترية لا بالدبلوم
(2) العمل في المستشفى مدة 3 سنوات
(3) ضرورة كتابة التخصص الحقيقي : صيدلي / بيطري / كيميائي .. إلخ على لافتة المعمل و على التقرير، كما تكتب بجواره : "الكيمياء الحيوية الصيدلية" أو "الميكروبيولجيا البيطرية".. إلخ
(4) إجبارك على ممارسة التحاليل التي قد تخصصت فيها ، وهذه قصة طويييييييييييييلة جدا

لكن هذه القصور غير معمول بها الآن ولله الحمد ، بل يريدون تنفيذها !!

* لقد خسرت نقابة الأطباء القضية المرفوعة ضدنا لمزاولة المهنة وأمام مجلس الشعب قوبل طلبهم بالرفض عام 94 بعد أن أستماتوا في تقديمه ومازالوا، هنا أعيد الحق لأصحابه ، لكن هناك من يعبثون بشد ذيل القط النائم من آن لآخر ، والذين يريدون الحصول على شعرة من شنب الغول الأسود وهو غافي !!

* الخلاصة .. التحاليل الطبية لا تعتمد على التشخيص السريري .. أنك - في المعمل - تتعامل مع عينة لا مع مريض ، وأنك الأكفأ والأجدر مقارنة بما هو مطلوب ، أنت تشخص فقط تشخيصا طبيا معمليا لا سريريا ولا تعتمد على الحالة الإكلينيكية في التحليل ، لكنها تؤخذ في الإعتبار ، وأكرر تؤخذ في الإعتبار.

إن ممارسة التحاليل الطبية
حقك ..

حقك ..
حقك !!

* في دول العالم الأول يتساوى الصيادلة مع الكيميائيين مع الأطباء مع البيطريين في الحصول على المناصب ، ومعروف أن رئيس الإتحاد الدولي للتحاليل الطبية صيدلي ويتناوب على رئاسة المنصب بيطريين وأطباء وكيميائيين وصيادلة.كما يتولى إدارة بعض معامل البرج المصرية أوالعربية بجانب الأطباء .. صيادلة وكيميائيين أيضا.

* وجدير بالذكر - ومعلومة لمن لا يعلم - أن من أبرز مؤسسي بعض أقسام التحاليل الباثولوجيا الإكلينيكية بكليات الطب العريقة هم أساتذه صيادلة وبيطريين وكيميائيين في علوم الميكروبيولجي والبيوكمستري !!!

حاشية : أنا لا أتحامل على الأطباء .. حاشا !!! فكثير منهم الزميل والقريب والصديق والأخ والأب (والله)، وأنا مؤمن بدورهم الفعال في المجتمع تمام الإيمان ، ومتيقن من عظم وتفعيل دور الطبيب في النهوض بمستوى الطب وأنه ملقى على عاتقه يمكن أكثر من 90% من مجمل الخدمات الطبية التي تقدم للمجتمع والأبحاث والوعي الصحي .. إلخ ، وده لو كان موضوع تعبير كنت كتبت 6 ورقات فلوسكاب وش وضهر !!! وإن كنت قد جرحت مشاعر أو آذيت أي من أخوتي الأطباء فأنا على اتم أستعداد أن أقدم له اعتذاراً فقط لمجرد أن يبدي سبباً ، وحقيقي .. حينما يتعلق الأمر بحق شرعي ورسمي وقانوني فمن كل المشروعية أن أدفع عنه وأطالب به ... ارجو من الجميع مشاركتي الرأي وإبداء ملاحظتهم بالتواصل الإلكتروني معي ..

ركزوا معايا يا جماعة .. وفنجلوا عنيكوا و طرطقوا ودانكوا

عشان أنت كصيدلي تفتح معمل بإسمك لازم تعمل الخطوات الآتية:

(1) أن تحصل على أحد أو جميع شهادات الدبلوم في الآتي :

+ دبلوم الميكروبيولجي العامة أو التطبيقية أو الإكلينيكية أو الماسترية (ماجستير) في نفس التخصص برضه أو على :

+ دبلوم البكتيريولوجيا العامة أو الإكلينيكية أو على:

+ دبلوم الكيمياء الحيوية التحليلية أو الإكلينيكية أو الماسترية فيها

(2) ح تاخد من النقابة درجة : أخصائي تحاليل طبية

ثم تأخذ التصريح من وزارة الصحة ويستغرق أشهر حسب دورك و العدد .. إلخ بس ح يكتبولك في التصريح عبار ": مع عدم التشخيص الطبي المعملي" يعني المعمل ح تبقى أنت مديره لكن مش صاحبه ؟؟؟ هههههههه

، ولن يسمح لك بوضع لافتة عليه ؟؟؟؟ ههههههههه
ولن يسمح لك بكتابة اسمك على التقرير ؟؟؟؟ هههههههه
ولن يسمح لك بأن تمضي على نتائج التحليل ؟؟؟؟ ههههههههه
إذن فبهذا التصريح ح تبقى كوكتيل ومزيج فريد من دكتور التحاليل وفني المعمل !!

(3) ح ترفع قضية وتقعد حوالي سنة ب 1000 ألف جنية بس عند محامي مشهور.
وح تكسبها .. ح تكسبها .. ومضمونة 100% (لأن ده حقك كصيدلي) .. المهم بعد لما تكسبها ح تبقى دكتور تحاليل فعلا .. وهنايسقط الفرق (عمليا) بينك وبين الطبيب الأخصائي !!

++ ملاحظة لا معنى لها ولابد منها !! : الفرق الرسمي (واخد بالك من الرسمي دي؟) بينك وبين الطبيب أنك لو خدت الدبلومتين الميكرو + البيو ح يبقى في سحب العينات فقط .. يعني لازم ح تجيب ورقة من دكتور طبيب أنه المسئول عن السحب في المعمل بتاعك ، وأنت اللي ح تسحب العينات برضه.. يعني عمليا مفيش فرق !!! وإحقاقا للحق .. ان هذا هو الفرق الرسمي الوحيد بين الطبيب وغيره في ممارسة المهنة

+ أسئلة ع السريع باختصار (مجاب عنها ) :
س 1 : إيه لزوم القضية طالما إن الموضوع من حقي وكده كده ح أكسبها ؟؟؟؟؟؟؟؟؟؟؟؟
ج 1 / إحنا في مصر !

س 2 : لأ بجد .. عاوز أعرف إيه لزومها؟

ج 2 / عشان يخوفك ويوهمك إن دي حاجة مش بتاعتك فتقوم جاي مطنش وتقول لنفسك في سذاجة: طالما أنه مش مسموح لي تبقى مش بتاعتي؟؟؟؟؟ في حين أنه حقك ودي لعبة "الحق يغتصب" .. نقطة تانية هي نوع من أنواع كوابح السيارات والفرامل عشان متكترش المعامل زي الأجزاخانات ! ويبقى بين كل معمل ومعمل مختبر !!

س3: إيه أفضل وأسرع شهادة لفتح المعمل (يعني م الآخر .. عاوز أنجز )؟؟؟؟؟
ج 3 / دبلوم ميكروبيولجي أو بيوكمستري وأنا بفضل الأخير ومدته سنه بس لكني أنصحك بال 2 .

س 4 : الليلة دي ح تكلف كام؟
ج 4 / الدبلوما تمنها تبع المكان (متوسط كله 2000 + 1000 القضية)

س 5 : طيب أخدها من أي جامعة أو من أي كلية ؟
س 5 : صراحة .. اشهر ناس شغالين في الحكاية دي كليات العلوم ..
عندك في صيدلة : المنصورة - الزقازيق - الإسماعيلية - عين شمس (بيخرجوا أعداد قليلة
عندك في علوم : اسكندرية (أشهر دبلومة تحاليل في الجمهورية وبتخرج كل سنة 700 أخصائي) - شبين الكوم ( بدأت تشتهر برضه بتخرج حوالي 700 ) - الإسماعيلية ( بتخرج حوالي 1000 أخصائي

عندك بيطري : مشتهر / اللي جنب بنها ( تنافس الأسكندرية وبتخرج حوالي 1000 أخصائي على ما اسمع ) - المنصورة (مبتعديش ال 50 في أي كلية) بس (علوم بكتيريا ممكن تعدي ال 80)

والموضوع ده فيه تفاصيييل تانية كتيرة وممكن أجاوب بالتفصييييييييييييييل الممل للي عايز

س 6 : طيب إيه أرخصهم وأسهلهم؟ ويديلي الشهادة ع السربع ؟؟
ج 6 / * احذر هؤلاء : المنصورة (معقدين أوي ) - عين شمس (ناشفة؟)
* تحاشى هؤلاء : مشتهر لاناللي بيدخل ما بيطلعش إلا فيما ندر - شبين (مهرها غالي 2500 ) - طنطا( !بيقولوا صعبة ومش عاطفية
* ارشح لك دول : الزقازيق و الإسماعيلية (باشا !!) - اسكندرية (شغالة ومانجه) – شبين (مووووووووووز / بس غالية) - بنها ( وأنت واقف!!!)

س 7 : طيب لو أنا (بالي طويل) وعاوز أبقى كفاءة في التحاليل وافتح جنب معمل البرج؟ !!!!
ج 7 / دبلوم ميكرو + ماستر أو دكتوراه في البيو ( أو العكس لكني أفضل كده)

س 8 : طب و الليلة دي ح تستهلكني في كام سنة؟؟؟؟
ج 8 / لو أنت بيدعولك في البيت كويس ح تقعد من 8 -9 سنين

س 9 للمحترفين فقط) : طيب لو أنا عاوز آخد جايزة نوبل في التحاليل أو كأس العالم ؟!!!!!!!!
ج 9 / دبلوم ميكرو + دبلوم بيو + دكتوراه في المناعة
ملاحظة : اعرف دكتور معاه كل دول .. واعرف دكتور تاني معاه دكتوراه الفلسفة في الميكرو + دكتوراه البيوكمستري وكاتب على المعمل :" معمل الدكاتره فلان الفلاني " وع التقرير كاتب :" الدكتور الدكتور" - فعلا بتاعة شهادات !!

س 10: ممكن أعرف إيه حكاية المناعة دي بقى؟؟
ج 10 / معهد البحوث الطبية / اسكندرية بيدي ماسترية للصيادلة في المناعة لكن بيطلب تقدير وبياخد بالعدد (بيطلبوا 2 من صيدلة بس ) يعني الموضوع ممكن يفرقع منك – وبيطلب برضه 2 أطباء – و6 كيميائيين .. تحيز؟
أو عندك معهد بحوث الهندسة الورائية / السادات وده بياخد كله .. ورخيييييص 400 في السنة ومفيش تمهيدي ماجستير .. يعني رسالة على طول + كورسات / سنتين وده بيدي دبلوم أو ماسترية أو دكتوراه أو دكتوراه الفلسفة في المناعة الجزيئية

س 11 / مين تاني ممكن يفتح معمل ؟
الزراعيين – الكيميائيين – الصيادلة - البيطريين – الأطباء
وجميعهم لابد لممارسة المهنة من الحصول على دبلوم أو الماسترية أو الدكتوراه في التحاليل
وجميعهم يأخذ درجة : " أخصائي تحليل طبية"

شكرا بجد يا دكتور محمد لان الموضوع ده شاغل فئة كبيرة من طلاب الطب البيطلرى والبنات بصفة خاصة لان صعب عليهم انهم يمارسوا فى الفيلد بس الحمد لله طمنتنا وواضح الاهتمام فى تبليغ المعلومة وأنا فعلا سألت بنات أخدوا الدبلوم فى البيو بس قالوا أحسن مكان الاسماعيلية (زى ما حضرتك قلت)لانها أسهل مش عقد زى المنصورة ..جزاك اللــــــــــــــــه خيرا

يااااااااااااااااااااااه ايه القصص دى كلها ...ربنا معانا

ومش شرط نشتغل فى التحاليل دا أنا إتعقدت من نص الموضوع بس
هههههههه

والله العظيم انت واد عشره على عشره يا سيمو
جزاكم الله خيرا

جزاك الله كل خير

بس انا تعبت من نص الموضوع

امال لما اجي اعملها ف الحقيقه

هيجرالي ايه

ياااااااااااااااااساااااااااااااااااااااااتر
ايه ده كله تعقيييييييييييييييييييييييييييييييد
شكرا على الموضوع الجميل يادكتور يادكتور

ياااااااااااااااااااااااااه دى انا كنت فاكرة الموضوع ابسط من كده
دى باين عليه طلع حاجةصعبة اوى دى انا افعد فى بيتنا احسن من البهدلة دى
كفاية اللى الواحد شايفة فى الكلية دلوقتى
بس شكرا يادكتور على الافادة

يا جماعة الموضوع سهل اخر حاجة
بس كل ما عليك نك تاخد الد بلومة
والمحامى هيقوم بالباقى
بس ابقى ظبطة بالفلوس علشان الشغل يبقى على مية بيضة زى ما بيقولوا

بس انا سمعت ان الموضوع ده اتلغي
مش عارفه بقي

عدل سابقا من قبل M.ELFOULY في 6/7/2009, 2:19 pm عدل 1 مرات

الى اتلغت تقريبا دبلومة الميكرو بيولجى
بس الى موجود هى دبلومة البايو
فى جامعة المنصوره
ومشتهر ببنها
ودى معلومه ماكده

شكرا على الافادة
وربنا يوفقنل كلنا

هل ممكن للطبيب البيطرى عمل مركز اشعة ؟وايه اخر اخبار التحاليل انا سمعت كلام كتير انها اتلغت ولامشتهر ولامنصورة؟ششششششششششششككككككككككككررررررااااااااااا

لا يادكتور الكلام ده عارفينه من دكتره رؤساء اقسام
انك مش هتعرف تفتح تحاليل عن طريقة الميكوبيولجى ولكن عن طريق دبلومة الكيمياء فى المنصوره ومشتهر
والله اعلم

شكرا يا دكتور علي الافاده
بس انا خلاص شلت دبلومه التحاليل من دماغي

عليا النعمة لو قالولى هيولعوا فيا انا داخلها داخلها وانت راجل زى العسل

» مصري يفتح صالون حلاقة باسم أوباما في أمريكا ههههه عايز يسترزق
» عايز تتكلم 6 ساعات من غير ما تخلص ولا قرش من الرصيد
» واحد سأل مصرى عايز تموت ازاى ؟؟؟؟جااااامده
» البروسيلا .(المحاضره لو عايز تفهما ).. وخطرها على الانسان والحيوان
» حصريا : لو عايز تحل امتحان البكتيريا الأسبوع الجاى أدخل (2009)