اوعى تقعد جمب ستك ليله الامتحان

الله أكبر الله أكبر...أذان الظهر...

يارب.. يارب بحق ده الآدان تنجح يا نون يابن ابنى وأشوفك دكتور أد الدنيا

ياستى بس أنا فى تجارة

وماله يابنى هو يكتر على ربنا....... ده ربنا قادر على كل شئ

ياستى ونعم بالله بس اللى بيطلع دكتور لازم يكون فى كلية الطب مش التجارة

ياللا تجارة تجارة ..ومالها التجارة ..دى حتى التجارة شطارة..ده الله يرحمه جدك كان تاجر فى الوكالة أد الدنيا

ياستى التجارة اللى فى الوكالة حاجة واللى فى الكلية حاجة تانية

ع العموم شد حيلك أنته وانا أخلى جدك يخدك معاه الوكاله عشان تتدردح وتتودك فى السوق

جدى إيه اللى هايخدنى معاه .....ده جدى مات من زمان ياستى

يامصيبتى عبد الواحد مات...ياحبيبى ياأخويا..مكنش يومك ياسبعى

ياستى ده ميت من تلاتين سنة

تلاتين سنه.. ده العمر بيجرى ياولاد تصدق ولا حسيت بيهم....ياللا أهو غار
فى داهيه....قطع وقطعت -سيرته..ده كان بخل الدنيا فيه..أن ما عمره دخل
عليه ببطيخة ولاكيس جوافة

ياستى حرااام عليكى عايز أذاكر بقى

يووه..وأنا ماسكاك ياوله..ذاكر ...ذاكرعشان ربنا يكرمك وتنجح وتاخد الدبلون

ياستى دبلون إيه...أسمه البكالوريوس

أنته عتضحك عليه ياوله..أسمه الدبلون الواد ابن فايزة جدع زيك كده فى مدرسة التجارة وخد الدبلون

خلاص دبلوم دبلوم ياستى ..سيبينى بقى عشان أذاكر

ذاكر ..ذاكر ياأخويا ذاكر... تعرف ياواد ..ندرن عليا يوم ماتنجح لأكون
رايحه خاطبالك عبير بت رئيسه....دى إيه ياواد.. أدب وأخلاق..وعلام كمان

ياستى عبير دى معاها أعدادية

وماله يابنى ...الراجل مايعبهوش إلا جيبه

راجل ...راجل مين ياستى...عبير دى بنت

عبير ...عبير مين ياوله..أنته بتعرف بنات من ورانا

لا إله إلا الله....أبوس رجلك ياستى أرحمينى بقه

طب ذاكر....ذاكر جتك نيله وأنته طالع براوى كده زى أمك....قطعت وقطعت
سيرتها...أنامش عارفه أبوك كان أجوزها على إيه..حكم...قال لبس البوصة تبقى
عروسة..بس واللى نبى النبى نبى لكون مبوظه الخطوبة دى ومجوزاه أنيسة بت
أختى

ياستى خطوبة إيه..أبويا مجوز أمى من خمسة وعشرين سنة ..وبعدين أنيسة دى بنت أخوك مش بنت أختك ..وأساسا إنتى ملكيش إخوات بنات

صحيح ياوله ..أنته عندك حق أنا مليش إخوات بنات...أصلى أنا أمى ماكنتش بتخلف صبيان

حرااااااااااااا ااااااااااااااا اااااام ............ستى ماتطلعى البلكونة شويه ...ده الهوا حلو بره

لأياخويا....فى جدع كده حليوه وشعره مسبسب فى البلكونه اللى فى الوش بيقعد يعاكسنى

خلاص روحى المطبخ ...أهو زمان أمى خلصت الرز

رز...رزإيه يابنى....هوأنا ليه سنان للمكرونه...أناهطلع البلكونه أحسن

طب أبقى خلى بالك م الهوى ياستى

هوى لما يلطشك يا بت يا جذمه انتى

الحمد لله أخيرا خرجت وقدرت أذاكر .. رحت الأمتحان تانى يوم وربنا كرمني وحليت كويس لكن للأسف المراقب سحب مني الورقة

قبل ما أكتب أهم حاجة فيها

ياترى أنا كان إسمى إيه؟؟ ياترى كان إسمى إيه؟؟
انا مين انا ليييييييه انا ازااااااى

ههههههههههههههههههههههههههههههههههههههههههههههههههه
اضحك الله سنك

سلمت يداك يادكتور

بس فعلا نوادر المسنين مضحكة جدااااااااااااااا؟؟؟؟

الناس الكبار دولى زى العسل فى الذكريات القديمه تلاقيهم زى البرابنط لكن فى الوقت الحالى فى الضياع

طبعا زى العسل
الناس دول بالهم رايق
مكنش عندهم بارا وباثولوجى
ياعم عقبالنا اما نبقى زيهم

فعلا الناس دي بركة كبيرة اوي في حياتنا دا انا ليا جدتي بتحكيلي قصص ولا ف الخيال وبتقولي انها حقيقية

موضوع ظريف جدا
انا عن نفسي مش بعرف أطمئن وانا رايحه الامتحان غير لما اسمع الدعوات دي الاول
ربنا يباركلنا فيهم ويجعل دعائهم مستجاب

ربنا يخليلتك ستك يا عسيلى

نعم يا حبيبى نعم انا بين شافيفك نغم

» المؤتمـــر السنــــوي الرابـــــع للإعجـــاز العلمــي في القــرآن والسنـــة بالمنصوره اوعى تفوته هتخسر كتييييييير